شيماء

شيماء البنت الشقية العفريتة الى مش بتقعد فى مكان واحد أكتر من 3:45ثاني و اليوم عندها حوالى 86 ساعة او اكتر بتعمل فيه مليون حاجة تروح الجامعة الصبح طبعا مش عشان تحضر حاجةوتلف ذى النحلة من شئون الطلبة لرعاية الشباب وتقعد تفضفض مع مدام نادية وتجرى تلم الفرقة علشان نشتغل و تعمل اجتمعات وبعد كدة تروح الورشة تهد نفسها فيها شوية وبعد كدة اجتماع على القهوة مع لحظات و بعد مناقشات طويلة عريضة عن حال الفرقة و مين راح ومين جيه و مين فاضى (فعلا شيماء هى الى بتلمنا)تخلص وتطلع تحضر عرض معرفش فين اصل شيماء بسم الله ما شاء الله معرفها كتير و بعد كدة تتمشى شوية وبعدها يالة بقى كفاية كدة نروح بقى مع ان اليوم لسة فيه بتاع 23ساعة لسة .شيماء عاشقة الحرية و المنادية دائما بحقوق المرأة و المسواة استقرت اخيرا و ربنا رزقها بابن الحلال و الناس بيقولوا انهم شبه بعض بس احب اقولها اهم حاجة تتشابهوا فى الدماغ و الطباع و الشكل يجى بعدين مع ان شيماء ذى القمر معلش بقى يا رفيق الدرب

على فكرة الى ميعرفهوش حد ان شيماء من اكتر الناس الى اثرواعلى شخصيتى و تفكيرى و طريقة حياتى يمكن هى اكتر حد فعلآ
يمكن نكون بعيد عن بعض حاليا بس انا عمرى ماهنسى ابدا شئون الطلبة الى كنا بنقعد عندها نحكى بالساعات و محسش بالوقت انه عدى بسرعة و لا عمرى هانسى شارع الهرم الى اخدناه مشى من مشعل للجيزة و لا هانسى مرسى مطروح والأيام الحلوة الى عشناها هناك (يارب تكونى لسة فكراها)ولا طبعا عمرى ما ها نسى اول عرض مسرحى جمعنى بشيماء مواطن مهرى و ايام البروفات و اعداد الممثل و احمد كمال الله يرحمه و روحه المرحة وخفه دمه الى كانت بتملى البروفات مرح مالوش حدود.
شيماء اول بنت اصحبها فى الكلية .انا حسيت بحجات كتيير حلوة مع شيماء عمرى ما حستها قبل كدة.مرة كنا ماشيين و قالتلى انها بتحس تجاهى بالمسئولية و انها بتعتبرنى اختها الصغيرة وعمرى ما هانسى بردة لما اتصلتى بيا مرة بليل و كنتى مضيقه و فضفضتى معايا كانت الفرحة مش سيعانى سعتها شيماء الى تعرف الدنيا كلها اخترتنى انا علشان تكلمنى و هى مضيقه.حاجات حلوة كتيييير جمعتنى بيكى ....يمكن تكون لسة فى حاجات احلى مستنيانا سوى : ) بس اللى اكيد ان شاء الله ان فى حاجات احلى واحلى مستنياكى مع رفيق الدرب ربنا يوفقك يا قمر